Skal brukast til å leggja til rette for meir attraktive lokalsamfunn.
Kommunal- og regionaldepartementet (KRD) har lyst ut 32 millionar kroner til prosjekt som kan skapa bulyst.
Departementet prioriterer i år prosjekt som går på inkludering av innvandrarar i distriktsområda, utviklingprosjekt retta mot ungdom og tilflyttingsprosjekt.
Eitt av måla med bulyst-midlane er å leggja til rette for meir attraktive lokalsamfunn. Departementet ønskjer også å få meir kjennskap til kvifor folk vel å busetja seg der dei gjer, heiter det i ei pressemelding frå fylkeskommunen.
Alle offentlege og private aktørar og verksemder kan søkja om midlane. Søknaden må innehalda eit konkret prosjekt, og KRD kan dekkja inntil 50 prosent av kostnadane med dette.
Fylkeskommunen samordnar søknadane om bulyst-midlar i Sogn og Fjordane, og søknadsfristen er 5. mars.
